「我唔想去Therapy，因為我驚會證實自己真係癡線。」

「我唔想去Therapy，因為我驚會證實自己真係癡線。」朋友同我講，佢擔心自己先係有缺陷、有病嘅人。

精神病唔罕見，近年好多人更以情緒病為榮，佢地會話喺香港生存冇白卡先奇怪。但真正尋求治療嘅人唔多，想求助嘅人又可能怕自己「真係有病」。

真正接受治療嘅人往往處於掙扎時期，可能係人生中最艱苦嘅時期，覺得自己最失敗嘅時候——承認自己需要治療就好似承認自己失敗，係種恥辱。

呢種諗法好Common，好多人都怕面對自己，怕承認脆弱，唔想俾人（家人、朋友、治療師）發現自己嘅不安全感。

但係，自願接受治療往往係理智嘅表現。Therapy is about exposing the rights rather than the wrong。

早前都有個案問我覺唔覺得佢癡線？我諗專業人士都會見到Client 本質上嘅缺陷，但缺陷唔係咩特別嘢，人人都有。決心去Therapy 反而係證明有決心獲得支持、克服障礙。

Therapy 中，掙扎可能顯得更真實，以前理解唔到嘅嘢卻顯得更澄明。

所謂嘅癡線可能比一切都更理智清醒——可能你先係家庭中唯一勇敢揭示問題嘅人，可能你先係拒絕瘋狂嘅伴侶，可能你當年已經用咗僅有嘅方法做到最好，可能你明白渴望被愛原來一啲都唔癡線。