世界盃心理學：個個忽然熱衷睇波？逆境勝出更令人振奮？

大家有冇睇世界盃？

四年一次足球熱又席捲全球，好多人都喺呢段時間迷上足球，IG 女神著波衫打卡影相，平日唔睇唔賭波嘅人都紛紛坐齊喺電視機前，都係有趣嘅心理現象。

熱衷世界盃主要同「社會身份改變」有關，本身支持自己國家隊好合理，但就算自己國家嘅球隊冇參賽、被淘汰，踢緊嗰隊同自己國藉無關都好，只要四周嘅氣氛熱鬧，導致「去個性化」，令每個睇緊波嘅人都自然融入一個群體，尤其係支持緊同一隊、著住同一件波衫，就會比平時更熱情歡呼尖叫。

去個性化（Deindividuation）係群體效應（Social groups effect），由於冇咁多自我評價同道德規範，群體行動就冇咁克制（Inhibited），所以越睇越旁若無人咁大叫。

不過冇咁克制唔代表一定有不良行為，幾興奮都好，睇吓日本球迷賽後都自覺清理垃圾。

仲有，除非落重注後輸到扔爛部電視，否則爆冷的話，一般人都相對興奮啲。大家可以留意日本隊逆轉勝，好多人勁開心、勁感動，Post哂足球小將片段出嚟。

當缺乏經驗嘅球隊越進步、表現越勇，球迷就越被激發「相信困難中成功」嘅希望，越期待佢地成功！我都覺得好感動，現實中體現漫畫般嘅體育精神的確令人振奮。